Bodils hjørne: Tips til helgekosen

Foto: Ronny Solheim

No nærmar helga seg og eg vil gjerne dele nokre gode mattips de kan kose dykk med. F.eks til søndagsmiddagen.

Kvardagen som kjøkensjef på Gloppen Hotell er full fart i høgt tempo med ny lærdom kvar einaste dag. Ein vanvittig spennande arbeidsplass der eg står fritt til å bruke dei aller beste råvarene og ikkje minst samarbeide med alle dei flotte leverandørane våre.

Eg får litt ekstra stoltheit til maten eg serverar, når eg kan presentere bonden, produsenten og ei historie til rettane våre. Trur eg rett og slett må ha verdas beste jobb og kanskje til tider verdas mest stressande!

I dag vil eg skrive litt om husmannskosten. Det er jo tross alt det vi lagar i kvardagen. Fyrste retten eg vil dele med dykk er ei god klassisk hjortegryte. Litt lenger ned på sida kan du lese om prosjekt eg arbeider med og mi favorittoppskrift på knekkekjeks.

På Gloppen hotell er hjort ei av hovudråvarene våre. Det er rett og slett noko av det beste ein kan få! På hausten får vi inn heile skrottar av lokale jegerar som vi parterar ned og møyrnar godt. Her har eg muligheita til å bruke alt av stykningsdelar – rein luksus!

Eg er så heldig å kunne ta imot 40-60 hjortar årleg frå rundt 20 lokale jegarar.
Hjortekjøt er mildt og godt på smak og reine helsekosten. Fordi hjorten beitar i det fri, inneheld kjøtet antioksidantar, mineraler og omega-3, i tillegg til at det er magert.

Vi brukar heile hjorten. Vi har biffar og filetar på a la carte- og selskapsmenyar, vi brukar bankekjøt og grytekjøt til gryta og så brukar vi resten til våre gode hjortekarbonader, hjortemør og julepølser.

Denne hjortegryta står ofte på lunsjmenyen vår til våre kurs- og konferansegjester, eller den blir bestilt til ulike selskap og lag. HjortegryteOppskrift Bodils hjortegryte til ca 6 pers

  • Ca 1,5 kg hjortekjøtt (gjerne bankekjøtt) kutta i grove terningar
  • 8 stk sopp (sjampionjong-aromasopp/eller andre typar du får tak på) delt i skiver
  • 1 heil lauk (kuttast i grove terningar eller skiver)
  • ½ sellerirot kutta i terningar
  • 3 gulrøter kutta i terningar
  • 1 kvast fersk timian
  • 4 stk einebær
  • 2 laurbærblad
  • 3 ss tyttebær ( evt. tyttebærsylte)
  • 4 ss godt smør
  • 3 ss kveitemjøl
  • 1 dl kremfløyte eller Crème Fraîche
  • Salt, pepper

Steik kjøtet i ei god og varm steikepanne og krydre med salt og pepper. Ha det over i ei kjele. Dekk kjøtet godt med vatn eller ei god kraft og kok kjøtet møyrt, dette kan variere litt på kor godt møyrna kjøttet er og evt. kor store kjøtbitar du har. Eit tips kan være å smake på kjøtet etter ca 1.5 time.

Ha laurbærblad og einebær i krafta medan du kokar kjøttet. Når kjøttet er møyrt ausar du det forsiktig ut av krafta og legger det i ei panne.

Fres smør i ei ny panne og tilsett kveitemjøl og lag ei brun jevning av dette medan du rørar og passar godt på, den skal ikkje smake brent! Sil så krafta som du har kokt kjøttet i over jevninga og rør godt ut. Om der skulle komme nokon klumpar, lat dette koke litt så du får vekk evt. melsmak av sausen.

Kutt opp sopp og lauk som du fresar i ei panne for seg sjølv og ha det over i sausen.
Ha seller gulrot, tyttebær og kjøtet tilbake i gryta og smak til med salt og pepper.
Ha så fløyta i og kok opp. Lat det trekke til grønsakene er møyre.
Hakk fersk timian eller andre gode urter og bland inn like før servering.

Server gjerne med ein god potetstappe. I denne må du hugse å ha i masse smør og gjerne Høgt og Vilt si potetkrydderblanding. Rørte tyttebær er også godt til.

Tips: Om du syns sausen i gryta blir for tynn, jevnar du litt ekstra med maizena rørt ut i kaldt vatn. Har nokon glutenallergi, bruk gjerne maizena og ikkje meljevning.

Kos dokke med søndagsmiddagen i lag!

Noko av det eg synest er kjekkast med jobben min er og møte så mykje folk og ikkje minst få vere med på ulike oppdrag der eg lagar mat saman med andre og sprer kunnskap om matglede og lokalmat. Noko av det eg arbeider med er:

HYBELMATKURS: Dette har eg hatt årleg på Firda Vgs, der eg lagar eit oppskriftshefte som elevane får utdelt. Dette inneheld gode oppskrifter som også er sunne og billege. Gjerne korleis dei kan få utnytta restar osv. Vi deler inn i grupper og alle lagar ulike middagsrettar som vi tilslutt set fram og forsyner laga reine «herremåltid av» i elevane sine auge!

KURS SAMAN MED TINE: Som intiveterte ansatte og familiane deira til kurskveldar. Dette kurset hadde vi fleire kveldar på skulekjøkkenet på Byrkjelo. Her laga alle familiane middagsrettar som heimelaga kjøtkaker, fiskegrateng, heimelaga fiskepinnar, skinkepai på grov botn, gode salatar og masse andre godsaker. Barna var mest fornøgde med frukt/bær -smoothies og grove pannekaker.

KANTINEKURS: Her kan kantineansatte lære litt om kva rettar dei kan lage i dei ulike kantine. Nokon har ikkje så stort kjøken og kapasitet, så då gjeld det å finne rettar som kan passe til kvar enkelt.Vi vart alle einige om at det bør komme meir fisk inn i kantinene rundt om.

Ellers håpar eg mange er flinke og involverar heile familien i middagslaging heime. Det er grådig kjekt å ta med barn på kjøkkenet. Ja det blir nok litt ekstra oppvask og gris, men pytt pytt -det vaskar de opp etterpå.

Her er oppskrifta på mine heimelaga knekkekjeks. Denne godsaken serverar vi på frukostbuffeten vår og eg lagar den i heimen min ofte.
Min son Jørgen på 10 år kjem heim og seie «Mamma eg har aldri hatt draget på jentene før du begynte og lage knekkekjeks som eg har med til niste…jentene flokkar seg runt meg for og få smake «….Så her er det bare å bake i veg, fort gjort og bak gjerne dobbel porsjon, det går fort unda!

knekkebrodOppskrift på VERDAS beste knekkekjeks!

  • 1 dl solsikkefrø
  • 1 dl linfrø
  • 1 dl sesamfrø
  • 1 dl havregryn(gjerne glutenfri)
  • 4 dl maizenamel
  • 1 dl olivenolje
  • 1 ss tørka oregano
  • 3 ss raspa permesanost
  • 5 dl kokande vatn

Bland alt det tørre i ein bakebolle og kok opp vatnet som du har over saman med olje. Rør til ei litt seig varm deig. Legg ein god kladeis av røra midt på eit bakepapir (som dekker ei langpanne i ovnen).
Og eit like stort bakepapir på toppen.. kjevle ut over det øverste papiret til deiga dekker heile papiret, helst så tynt som mogleg. Ta av det øverste papiret forsiktig og rut opp deiga med ei pizza rulla i passe store bitar og strø over litt maldonsalt(grovsalt). Fortsett slik til du er tomt for røre, det skal bli ca 3 heile gastronombrett av røra.

Steik i ovnen på varmluft 145 gr i 45-60 minutt (alt etter tjukkelsen), dei skal vere gyllen i fargen og heilt sprø! Knekk opp og server slik dei er, her trengst ikkje noko pålegg bare super digg snaks.

Kjem tilbake med fleire oppskrifter seinare.
Stor og god matglede frå Bodil kjøkkensjef!

Foto: Ronny Solheim, Bodil Fjellestad Eikrem og Lindy Paulen

Legg igjen en kommentar

Din e-postadresse vil ikke bli publisert. Obligatoriske felt er merket med *